中国缝纫机网 - 缝纫机行业门户网站 !

商业资讯: 缝制文化 | 服装信息 | 国内动态 | 环球信息 | 企业动态 | 数据统计 | 政策法规 | 制衣技术

你现在的位置: 首页 > 商业资讯 > 政策法规 > 蝴蝶牌缝纫机个故事
U.biz | 商业搜索

蝴蝶牌缝纫机个故事

信息来源:zgfrw.com   时间: 2019-07-19  浏览次数:38

文/杨保飞

小辰光经常听大人讲“千金在手不如一技傍身”,后来有段辰光,我对缝纫发生了兴趣。

要缝纫服装先要学裁剪,呒没师傅教,就想寻几本裁剪书自学。好勿容易从一位同学搿搭借来一本裁剪书,我“如饥似渴”个拿搿本书前前后后翻了一遍又一遍。幸亏我学过机械制图,服装裁剪图倒也勿难看懂,先拿张报纸代替布料比比划划,依样画葫芦,剪出来个纸头看起来倒也像模像样,勉强可以算“无师自通”了。

借来个书总归要还个呀!跑遍上海个新华书店又根本买勿到。哪能办呢?“自家动手抄!”直到今朝,我还真个咾“佩服”自家当年个勇气搭仔决心嗰,换到现在,啥人还会做迭种戆事体啊?

凭借自家机械制图个功力,一张一张个拿整本裁剪书里个所有图纸侪画下来,还有书里向附加个裁剪指南文字资料也统统抄录一遍。前前后后用脱一个多月,以及一大叠白纸头,成功“复制”了搿本裁剪书。或许是舍勿得曾经花费个心血,或许是一种怀旧情结,即便后来几次搬迁新居,搿本“手抄本”始终辣辣我个书橱里拥有一席之地。

学会裁剪只是第一步,接下来就是学缝纫,但是对我来讲做针线活比裁剪困难得多,好在现在有捷径可走——只要买一架缝纫机,就可以解决问题。勿过,埃个年代,物资供应匮乏,像缝纫机、自行车、手表咾啥,侪要凭票供应。按照阿拉姆妈单位里向票证登记排队个次序,姆妈想要拿到缝纫机券,说勿定要等十年。幸亏姆妈人缘好,也特别好讲闲话,肯帮人家忙,譬如:逢年过节单位里向需要安排值班,别人侪讲屋里向有事体,姆妈总是一口答应替别人值班,从来呒没怨言。这趟姆妈搭工会主席提了想要缝纫机券个要求,单位里居然破例提前发拨姆妈一张缝纫机券。就为搿桩事体,我兴奋了好几天。

有了缝纫机券,爷娘又东拼西凑了一百块洋钿,寻了一个休息天,带着我和弟弟一道去缝纫机商店。店里卖个是上海生产个蝴蝶牌缝纫机,算是名牌产品,整机单价一百五十块,明显超出预算。阿拉几个人辣店堂里兜仔半日天,想等等看有勿有便宜一点个处理品,结果到夜快点还是空手回去。

吃好夜饭,我搭弟弟愁眉苦脸坐辣床边浪,看看手里向个缝纫机券,真叫一筹莫展。已经辣房修队木工班做徒工个弟弟突然一拍大腿,讲有办法了。伊个脑筋果然比我活络,伊讲,商店里看到有单独卖缝纫机机头嗰,大概七十六块,边浪向还有得卖次品个缝纫机铸铁机架,顶顶便宜个只要十五块,两样加起来九十一块,至于缝纫机台板阿拉可以自家做,成本也就几块洋钿。搿能一来,总价勿到一百块!

第二天一早,我就到缝纫机商店等开门,买仔蝴蝶牌个缝纫机机头,又拣仔一副铸铁个机架。我拿出纸笔搭仔尺子,拿缝纫机台板个尺寸仔仔细细量了又量,画辣纸头浪,回去可以自家动手做呀。

就搿能介,阿拉屋里向终于有了一架漂亮又实用个蝴蝶牌缝纫机。为了表彰弟弟个功劳,我决定自家做个第一件衣裳就是弟弟个两用衫。辣八仙桥布店里,我买到一块藏青色零头布,尺寸正好够做一件两用衫。为啥买零头布呢?一方面零头布价钿便宜,另一方面是买零头布勿需要布票,所以当时布店里个零头布老吃香了,要想买到尺寸合适个零头布,要么是运气特别好,正好碰着前一个顾客剪剩下来个布尺寸合适,要么就是有熟悉个布店营业员帮忙留货。

量了弟弟个身材尺寸,翻开我自家“手抄”个裁剪书,仔仔细细拿两用衫所有裁片剪好。再花一角五分,到服务站“拷边”,搿能样子做出来个衣裳才牢固耐穿。

勿怕侬笑话,搿是我第一次踏缝纫机,刚开始辰光手忙脚乱,一个勿当心缝纫机就自说自话来一个“倒车”,断线、缠线,搞得来一塌糊涂。呒没办法,我只好左手掌握布料推进,右手挡牢缝纫机头右侧个飞轮,战战兢兢,好勿容易拿弟弟个两用衫做出来。等我个“杰作”穿到弟弟身浪,阿拉两家头侪老开心了。

现在,我已年届古稀,弟弟也过了花甲之年,迭架蝴蝶牌缝纫机依然摆辣客厅里。偶尔,伊还会为屋里向个缝缝补补贡献力量呢!

    ——本信息真实性未经中国缝纫机网证实,仅供您参考